Tlangpar hriamhrei kai tangrual a simi TNLA, MNDAA le AA cun SAC ralhrang in Phakan ih tuahmi KIO din cam kum 62 kim, hmuahnak concert bomb a thlak thu ah an riahsiat zet thu, thu an suah.
“SAC ralhrang ih mi an lemsiah theumi mei-ci le daidaw phawtmi lakah thisen daiter loin fimkhur zet le a tikcute ah lungrualnak thawn tuah dingmi tuah rupro dingin kalbak kan kai caan a thleng,” tiah Northern Alliance cun an sim.
SAC ralhrang hi ni khat hnu ni khat a cangvaihnak a bese deuhdeuh ih Myanmar mipi pawl khalin ralrin thiam a tul vekin ramdang pawl khalin an thlingthlak ih a zamrang thei bikih hremnak an pek lohli a tul, an ti fawn.
SAC ralhrang cu raldonak ah siseh, ramthukhelhnak khalah siseh atufangah a tlaksiat vanglai a si vekin cauh-thu-ba-rawh ah mawhnak nei lo mipi pawl hmuitin in a do thlang.
Cu hleiah ralhrang pawl hi ralkap tlingtlak an um nawn lo ih ttihhrut zetin Jet Fighter a hmang ih zanttim laiah bomb a thlak, pukpi in mi a kap thlang. Hi a cangvaih dan zoh tikah ralkap daan kalhnak le ramhrin mipi pawl parah sual tawpkhawk a tuahzia fiangfai zetin a hmuh theih, tiah an sim.
SAC ralhrang in mawhnak nei lo mipi pawl parah sualnak a tuahmi liangluang ruangah a phutawk hremnak le mipi pawl ih dingthluk lairelnak an ngah theinak dingah Northern Alliance cun an beisei thu an rel lang fawn.
October 23, zan nazi 8:40 ah Kachin ramkulh, Phakan peng, အနန့်ပါ khua ah KIO din cam kum 62nk hmuahnak concert an neih laiah SAC ralhrang in Jet Fighter in bomb a thlak ih mi 80 lenglo an thi.
Leave a Reply