Kachin ramkulh, Phakan khawpi Mawshin veng ah hnen-um nute in inntektei’ rawlhmeh ah tursia a rawi ih sumpai ru dingin a zuam, tiah theih a si.
February 11 ah hnen-um nute cun rawlhmeh ah thih sii a rawi ih a eitu inntek 4 cu sizung ah an thleng, an uico 3 khal an thih thu innteknu in a sim.
“Rawlhmeh ah thih sii a rawi kan thei riai lo. Ka rilrawng tukih ka ei. Nazi hrek hrawngah ka luzing tuk ih ka luak. Kan inn ih kan hnatuantu 2 khalin an ei. Ka pasal khalin a ei ve ko.
Rawlhmeh hi kan zoh thatsal tikah an dum theh. Ka pasal cun theihthiam loin uico pawl a pe hai ih kan uico 3 cu an luak hnuah an thi,” tiah innteknu cun a sim.
Atu ahcun hnen-um nute cu zo ti theih lo, mipa 5 in an hruai. A hruaitu pawl hi sinfen menmen hruh an si ih handcuff an rak keng ih a kut an khit, tiah innteknu cun a sim.
A ra hruaitu mipa 5 cun thu an suh tikah hnenum nute cun amah in thih sii a rawi thu le sumpai, thilri a ruk theu thu a phuangaw.
Hnenum nute hi kum 15 hrawng a si ih February 1 lawngin hi inn ih um thok a si. A um thok ihsin inntektei phone a hlo hnuaihni ih CCTV an bun ruangah lungawi loin tuvekin an rawlhmeh ah thih sii a rawinak a si.
Anih cun coka ahcun CCTV an bun lo ruangah inntektei’ rawlhmeh ah thih sii kan rawi ngam, tiah a phuangaw vivo.
“Kan inn ih a ra um thok ihsin kan phone a hlo. Atu ahcun a ruk thu a phuangaw. Dawr ah ka zuar a ti. Kan dawr ahhin company lamin vei hnih khat sumpai in ra pe theu.
Cumi cu kan hnenum nute hin a hmu ih thinlung sual a pu si bik ko,” tiah innteknu cun a sim vivo.
Leave a Reply