Hi pawl hi ‘Duhdawtnak diktak’ tiin kan ko (10)

A thiang le fekmi duhdawtnak diktak hin thinlung le taksa damnak a thlen, tiah mithiam pawl in an sim. Pakhat le pakhat pomawk, hnamawk, kuahawk hin thinlung a zangkhaiter ih hnangamnak, diriamnak pawl mi a pe thei.

No description available.

Duhdawtnak diktak cu a tanglam ṭhen (10) in a ṭemkhawm.

1. A sur a sa tuartlangnak:

Duhdawtnak hin ziangkim tuartlangnak a khihhmuh. Nom caan, lungawi caan khalah nuamtlang, lungawitlang ding a si vekin harsat mangbang caan khalah tuartlang ding a si. Ruah sur, ni sa hnuaiah nun hmantlang ding a si vekin hringnun zalam sok so khalah fehtlang ding a si.

2. Tuahnak in langter:

Duhdawtnak cu kaa lawngih simawk men si loin tuahnak in langter a si ṭheu. Kaa in vei thawngkhat ‘ka lo duhdawt tuk’ ti si in tuahnak samphang tia hman a tel lo ahcun cui’ duhdawtnak cu ruah pai lo, mero zam vek men a si. Duhdawtnak diktak cun a duhdawtmi hrangah ṭongkam men hnakin tuahnak in a langter sawn ṭheu.

3. Kilvenawknak:

Pakhat le pakhat duhdawtnak hin hruang kulh a nei ih cumi hruang kulh sungah a duhdawtmi cu a tlanglengter. Hruang leng a lan ding khi a ngai ngam lo ṭheu. Himi ruangah khuahkhirhawk tuknak a si cuang loih an pahnih lungrual in duhdawtnak hruang kulh sungah an khumaw tar men. Buainak an nei lo.

4. Theihthiamawknak:

Koprem zaten hin duhdawtnak tahfung a bangaw lo men thei. Asinan khat le khat thazang pekawknak, theihthiam zawnruahawknak, ngaithiamawk tonawk tivek lawngte a duhdawtawmi taktak cun an nei tlangpi.

5. Lungkhat thinkhat:

Thinlung dangdang nei, zawh duhmi lamzin bangaw lo khi rei an remaw thei dah lo. Asinan duhdawtnak diktak neitu cu an hmuitinmi a bangaw ih an fehtlang, an kekar a rualaw ih thinkhat lungkhatten an nun. Hlawhtlinnak khal an hmu rori.

6. Ṭuanvo laktonawk:

A kopremmi duhdawtnak diktak neitu cun khat le khat ṭuanvo an laksakaw ṭheu. Pakhat a damlo asile a damtu in a tuamhlawm. Pakhat ih poihaimi pakhatin a tawlrelsak. Pakhat a beidong asile pakhatin a hnem. Pakhat a lungawi asile pakhat khalin a rak lungawipi ve. Pakhatih nomnak kha pakhatih ṭuanvo laksakawk khi duhdawtnak diktak a si.

7. Sinak vekih pomsakawknak:

Duhdawtnak diktak cun a duhdawtmi khi thlengh danglam tum ciamco hnakin a sinak vekvekin a pomsak men. Zohman mi famkim kan um lo ti theiaw in a duhdawtmi parah a phut sang dah lo. Minung hi ‘cet’ kan si lo ti a thei ih a duhdawtmi kha cet men bangin a sor dah lo.

8. Duhdawtnak hi dawngte puah men a si lo:

Duhdawtnak diktak cun a duhdawtmi kha thinheng dingin, thanau dingin, ngoltau dingin a puah dah lo. I hua vang seh, tiin a duh lozawng khalin a um hrim dah lo. Duhdawtnak cu a hngetkhoh tuk ruangah sawihnin ciamco a tum dah lo.

9. Tuahtlang, ṭuantlangnak:

Duhdawtnak diktak cu a dangdangah ṭhenaw zelzel loin thil an tuahtlang ṭheu. Pakhat a khawm ih pakhat puai hmun ah a feh tivek a si lo. Ziang hmuahhmuah tuahtlang a remcan lo hmanah thil hminsintlak deuh lole hna pakhatkhatah lungrualtei’ tuahṭuantlang khi duhdawtnak diktak ih hmuithlam pakhat a si.

10. Tangdornak:

Duhdawtnak diktak cu a duhdawtmi hnuaiah sal vek rori in a tangdor ṭheu. Thuneihnak ah, thuṭhencat ṭul ah a duhdawtmi ih an a ngai hmaisa ṭheu. A duhdawtmi ih remti le duhdan khal a pomsak thei ih a duhdawtmi parah thuneih a tum dah lo. Cutin an karlakah buainak a suak dah fawn lo.

Be the first to comment

Leave a Reply

Your email address will not be published.


*