Harsatnak phunphun ruangah PDF pawlkom pakhat cu Official in an ṭhiat thu an tarlang.
Shan ramkulh thlanglam, Danu mahte ukawknak ngah ram, Ywangan hrambun Ywangan Poeple’s Defense Force (YPDF) cu harsatnak phunphun ruangah cangvai vivo thei an si lo ruangah an ṭhiatbal thu an pawlkom in official in thu an suah.
June 30 ihsin thok in Ywangan PDF cu official in kan ṭhiatbal a si, tiin anmah ih Facebook page ah an tarlang.
Pawlkom din pehzomnak dingah sum le pai, umnak khuaram pawl a remcan nawn lo ruangah cangvaih a harsa ih kan ṭhiatbalnak a si, tiah an sim.
Hi pawlkom hi June thla thok lamah khan harsatnak an tong zo ih Ywangan suahsan in hmun dangah an cer. Cumi hnuah dintharsal in kan ra kirsal ding, tiah thu an suah lawk nan, atu ahcun ding thei nawn lo dinhmun ah an um thotho, tiah theih a si.
YPDF cu ṭhiatbal sihmansehla hmailam ah SAC ralhrang donak pawl ah an tel vivo lai ding thu an rel fawn.
Leave a Reply