Hringnun sumtual ih na tlanlenpi pawl ziangvek minung an si, ti theih na duh asile a tanglam bangin in um sin aw!
1. Hni awla mi hmuahhmuah in an lo hnihpi ding. Na ṭhat lai, na mawi lai, na lungawi lai caan ah zohman huatu na tong dah lo ding.
Asinan, ṭap hnik aw! Zohman in an lo ṭahpi lo ding! A lo tuarpitu taktak cu na thisen zompi hleilo an si dah lo ding. Mi malte cun mitthli thengre zun zat an lo hlan ve hmanah thaisun ah an lo hngilh mai ding.
2. Na aipuang in soklek in zaihla mawi sak hnik! Na aw cu a khawk ruangro ding ih thingkung hrampi tiangin an hmarngai phah ding.
Asinan thinpit mangbang vansang in na thawpi suahin aihram hnik. Zohman in an lo cu-kha lo ding.
Na lungawinak au aw le na aihramnak au aw, cuaithlai hmang hlir an si, na hmu ding.
3. Sumpai tampi nei hnik! Rualpi siarcawk loin an lo pan ding. Na theih dah lomi khalin na hrangah thih an ngam mai ding.
Asinan na neihmi semhlo a si caan ah na nai bik sungkhat le rualpi hmanin doral zoh in an lo zoh ding.
Nan tonawk tinten kutdawh ah an lo ruat ding ih an lo zahpi fawn ding.
4. Pangpar vekin par hnik! Tizu thlumte na pamṭhat ahcun khuai le phengphehlep in an lo bawr vualvo ding. Asinan na par a ṭil ih lei ah na tlak a si ahcun pangang hmanin a lo ṭam paih ngut lo ding.
5. Na theitawkin kawhhran, khawtlang le pawlkom ah hmangaw hnik! Na hmanawk thei kulhsung cu mi ih duh na hlawh ding ih fak le lom na co ding.
Asinan na hmanawk thei nawn lo cin cun na thuanthu a cem. Zo na si ti hman an lo thei nawn lo ding.
Hi hmuahhmuah na theihsuak ngah ih hringmi kan ziaza na zir ngah hnu ‘Nun sung sing lawm, thih hnu kung tlung’ timi na sarsuahzawng ahcun na tikcu ṭhen thum ih ṭhen khat bak a tang nawn lo ding!
Leave a Reply