Games aatcilh suakthuan cun a games lek bang dingin a nu in a don ruangah a kah that

India ram, Utttar Pradesh ih suakthuan pakhat cun Games a lek theumi a nu in a kawk ruangah meithal in a kap that, tiah theih a si.

Suakthuan kum 16 mi cun a kah thatmi a nui’ ruak cu ni 3 sung a thup ih, tiah palik pawl in an sim. A kah that ni hi tlawngkainithum ah a si ih a nui’ ruak an hmuh ni cu zarhpini ah a si.

Hi suakthuan ih phuanawk dan vek asile anih hi Games aatcilh a si ih cumi cu a nu in Games lek nawn lo dingah a kham theu.

A nu in Games lek nawn lo dingah a kawk theu cu a thincik thei zet ih a pai’ meithal cu la in amah hringtu a nu rori cu a kap that tariai. Cutin a nui’ ruak cu Aircon room ah rimse lo dingin ni thum sung a thup.

Hi suakthuan kum 16 mi hin naunu kum 10 mi a nei ih a thiltuahmi zohman sim lo dingah a naunu cu a hringhro.

Asinan an innhnen pawl in a nu an hmuh lonak a rei le an inn ihsin thil rimsia an theih ruangah palik ah an report. Palik an va thlen cun a nui’ ruak cu an hmu.

Palik hnenah suakthuan pate cu thuphan a per ih electician pakhatin a nu cu meithal in a kap, tiah a rel. Asinan palik pawl in an zingzoi vivo tikah thudik cu pheh theih loin a lang. Cumi cu a naunu in a phuangsuak ih a nui’ thih dan le a upa in midang hnenah sim lo dingih a hrinhro pawl a relsuak tariai.

A pa hi acozah hna tenau tuan in West Bangal ih a um laifang a si. A nufa tan in a hnatuannak ih a um laiah tuvekin a innsang lamin siat an rak tong.

Hringtu nu kap thattu suakthuan cu a kum a kim hrih lo ruangah daantat dan ding an tawlrel rero lai, tiah theih palik bawi Oasim Abidi cun a sim.