Shan ramkulh, Muse khawpi ah November 10 zing ah China tlawnginn ih nauhak pakhat cu a lek rero laiah a bah ih a thil kenmi fungthul (Grilling Sticks) in a mit a sawh, tiah tlawmngai pawlkom hnen ihsin theih a si.
“An tlawng ih thilthleng a si. China tlawnginn ah a si ih kum 8-9 hrawng nauhak a si. Amahte a lek ih a tolh sual,” tiah Hna-lung Hla tlawmngai pawlkom ih tuanvoneitu cun a sim.
Nauhak hi fungthul ih dawh, sa emmi keng phah in a lek ih a bah. A fungthul kenmi cu a mitbu ah a phunaw cercer. Nu le pa hin mai’ fate cio hivek fungthul, thilthul le zumhriam keng phah ih lek lo dingah sim ding a si, tiah tlawmngai pawlkom ih tuanvoneitu cun a sim.
“China tlawng ah sa emmi ei phah in a rualpi pawl a teer ih rinlo paral ah a tolhtlu. A mitbu sungah fungthul a lut,”
A mitbu sungih fungthul cu laksak ngam loin tlawmngai pawlkom cun Muse ihsin Lashio khawpi ah an fehpi.
Lashio khawpi ih sizung in an tuamhlawm ngam lo ruangah Mandalay sizung ah fehpi a si.
Leave a Reply