Global Town Hall 2022 ih thusim dingih sawmmi NUG ramdang palai Daw Zin Mar Aung in thu a simsal lo Foreign Policy Community Indonesia (FPCI) ih hohanak in tuahmi Global Town Hall 2022 ah NUG ramdang palai Daw Zin Mar Aung cu thucah simnak nei dingin sawm a si nan, a sawmtu lamah harsatnak le dodalnak an ton ruangah hi sawmnak cu an thulhsak, tiah theih a si.
Hi conference ahhin Daw Zin Mar Aung cun Myanmar ram in tufang a tonmi Democracy duhtu le ralhrang karlak thu, thanso duhtu le ralthuam rinsan ih uktu karlak thu a rel tum, tiah theih a si.
“Lungrualnak thar thawn hi sawmngiarnak hi remcang zetah kan thlengh ding. SAC ralhrang in rampi thuneihnak a lakmi kan dodalnak lamzin ah Myanmar ramhrin zate le biaknak bangaw lomi pawl hnen ihsin ruahnak kan lakmi pawl, hi conference ahhin theihter ih in nemhngehsak a tul zet,” tiah Daw Zin Mar Aung cun a thucah dingmi ah a telh.
Hi conference ahhin Daw Zin Mar Aung lawng si loin a kuttang U Moe Zaw Oo khal tel dingih sawm a si lawk nan, programmee an phiahsal ruangah an pahnih in an tel thei lo ding, tiah NUG cun thu a suah.
Himi thu thawn pehparaw in East Timor president Jose Manuel Ramos-Horta cun Myanmar hi UN in an phatsan vekin phatsan an tuar lala a si hi, tiah a tuar natpi thu a rel.
UN hin SAC ralhrang siseh, NUG siseh pommi bulba um loin laklawh zet dinhmun ah a ret ih cuvekin FPCI khal a cangvai ve, tiah East Timor president Jose Manuel Ramos-Horta cun a soisel hai.
Hi Conference hi November 5 ih tuahmi a si ih NUG ramdang palai thucah sim thei lo dingih dawnkhamtu hi UN a si, tiah NUG ramdang palai sangtu U Moe Zaw Oo cun a sim.
FPCI conference ah NUG palai kan kai asile thleidanawknak a um, tiah UN ih thunei zet pakhat in a hmuh ruangah FPCI organizer hnenah NUG palai tel lo dingin a nor, tiah U Moe Zaw Oo cun a sim.
Conference ttiak ah FPCI hotu pawl cun NUG ramdang palai sangtu U Moe Zaw Oo hnenah ngaithiam an dil, tiah theih a si.
Leave a Reply