Federal ramkulh pek thu ah Dr. Lian Hmung Sakhong talbuai, NUG hin daan an nei lo si pei maw!

VOA in NUG ih Minister of Federal Union Affairs Dr. Lian Hmung Sakhong cu audio in thusuhnak an nei.

VOA cun, “UWSA in SAC ralhrang hnenah Wa ramkulh an dil thu, 2008 daan hrampi remh thu ah SAC ralhrang hin anmah tlon lungawi pawl hnenah mahte ukawknak pe sehla zohman in an el thei fawn lo.

Cutikah tlangparmi pawl in SAC ralhrang an naihniam deuhdeuh pang pei maw,” tiah a suh tikah Dr. Lian Hmung Sakhong cun a tanglam vekin a let.

“A cang theilomi le ttansantlak lo a si. 2008 daan hrampi khal mipi in kan hngong zo. Curuangah SAC ralhrang in a pek dingmi ramkulh timi cu daan loin hmunram pakhat ih inn sak vek fang a si. Zianghman ruahsan ding a um lo.

Kannih ih Federal Charter ahcun ziangvekin Federal Democracy rampi kan din ding, timi fiangfai zetin kan tarlang. Fehphung (Guide-line) 5 le daanhram (principle) 64 kan nei.

Curuangah ramdinkhawm kan din ding tikah Wa siseh, ramkulh dang siseh, ramhrin miphun pawl ih hmailam ruahsanmi Federal kan sersuak ding.

Ramthen 7 sungih hmunram pawl…tahthimnak ah Sagaing ramthen tlunlam tivek. A hlanah hi thu hi thungaithlak in kan relkhawm zo. Independence kan ngah pekte ih  ခန္ဓီး၊ ဆွမ်ပလွန် le တောင်တွင်း tivek pawl…ramkulh thar din vivo in Federal uknak kan din ding.

Cu lawngah a hngetkhohmi rampi kan a si ding,” tiin a let.

Dr. Lian Hmung Sakhong hin NUG ih Federal ram a din tum dan siseh, ramkulh thendan siseh, ramthen 7 pawl ziangtin ramkulh 1 ah an tuah ding tivek pawl a rel lang lo.

Himi thu ah tlangpar miphun in NUG parah hmuh sualnak an nei ih Myanmar ramsung ih ramhrin 8 cu ramkulh 8 ah canter a si lawngah Federal ram diktak kan si ding, tiah an rel cio.

Tuvek a si ahcun Kawl umnak ramthen 7 hi a kelten NUG hin an fehter thotho ding a bang! Ziangahtile kan dungte ah Kawl umnak ramthen 7 cu a hmin in ramkulh (State) an puter ih tlangpar mi pawl ih dilmi Bama State an sersuah ngam lo.

Cu hleiah NUG hin tuni tiang Federal a fehpi tum dan, mipi hmuh ah a phosuak hrih lo ruangah an hawmthawh cio. Atu khalah Dr. Lian Hmung Sakhong in baibah zetin a simsal ih comment-tu thenkhat in an vuivai.