Fate 44 a hring zo nan, nau a pai vivo lo asile a harhdamnak a siat thei, tiah sibawi in sim

World record ih tel ban nupinu pakhat cu fate a hrin bet lo asile a harhdamnak hrangah a poi sawn thei, tiah sibawi pawl in an sim.

Mariem Nabatanzi timi nu cu kum 40 a si ih fate 44 a nei zo. A hrangah cun sangkang sivai tivekin sullam a nei lo. A sul a cak tuk tiah theih a si.

Mariem Nabatanzi hi Africa nisuahnak Uganda rammi a si ih fate a neih tikah phir 4, phir 3, phir 5 tivekin a nei ih vei khat lawnglawng phir loin a nei. A fate 6 cun an thihsan ih a pasal khalin an innsang sumpai lasuak in a tlanhlohsan, tiah theih a si.

Atu ahcun Mariem Nabatanzi hin fate mipa 20 le nunau 18, an zate kom in fate 38 thawn an hmei. Amah lawngin a fate pawl harsat zetin a hmeihpi.

Mariem Nabatanzi hi kum 12 a si laiah a nu le pa in an zuarmi a si. Kum 13 ah pasal a nei ih a fa hmaisabik khal kum 13 a ti ah a hring.

An khua le ram ahcun ‘Mama Uganda’ tiah an ko. Anih hi vanduai maw, vanthat ah sim a theih lomi nau-inn danglam zet neitu a si. A nau-inn hi nunau dang vek si loin Hyperovulation timi a nei, tiah sibawi pawl in an sim.

A sullam cu a nau-inn vang a kau tuk, tinak a si. Curuangah naupai a olsam ih a ci a tha zet. A hrangah cun nauneih hi a harhdamnak bik a si, tiah an sim fawn.

Nunau dang vekin nau nei nawn lo dingin tuahaw sehla a harhdamnak a siatsuah sawn ding, tiah an sim hrih.

Sangkang sivai a ei khal le umzia a nei lo. Nau phit bang sehla pum lole a ham ah tidai a tling thei, thisen a khang thei, a kaileng an siat thei, sul lam harsatnak a nei thei, a thawthawt a har thei, tiah sibawi pawl cun an sim hrih.