Falam ah tlawngta hrinhronak catar ruangah zohman tlawngkai ngam lo

Falam BHS (2) tlawng fehnak lamzin sirah tlawngta pawl hrinhronak ca an tar.

Chin ramkulh, Falam khawpi ih BHS (2) tlawnginn kiangah June 13 ah bomb vei khat a puak ih SAC ralhrang pawl meithal an kap, tiah theih a si.

Tuni June 14, zingpit ah BHS (2) tlawng fehnak lamzin sirah tlawngta pawl hrinhronak ca an tar ruangah tlawngkai ngam loin an kirsal thluh, tiah thuthang theih a si.

Lamzin sirih an catarmi cu, “Tlawngkai hlah, Falam hmin na siatter.” ti le “Nan fate pawl thi ruak hmuh nan duh asile tlawngkaiter uh,” ti a si.

Hi catar thu thawn pehparaw in CNO hotu pakhat cun, “Catar thu ah zianghman kan theihpi lo lawlaw. Ralhrang lamih tarmi a si thei vekin mipi lam khalih tarmi a si thei,” tiah a sim.

Cuhleiah Falam khawpi sungah June 14 ihsin thok in zan nazi 8 hnuah zohman vaksuak lo dingin SAC ralhrang in thu an suah.