Falam khawpi sungah SAC ralhrang anmah le anmah an kapaw ih pakhat thi in khawsung mi pakhat hriamhma a ngah.
July 15 zan ah SAC ralhrang pawl cu motor in Falam khawpi an helkual laiah tualsungmi pakhat an kap. Asinan anmah ralhrang veve an kapaw ngah ih ralhrang pakhat a thi, tiah theih a si.
Thilthlen dan cu Pathangkhan PCM biakinn kiangah SAC ralhrang pawl khawpi hel in an vaksuak.
Khawsung mi pakhat lamzin ih vak an hmu ih ralhrang pakhat cun a kah tikah anmah ralhrang lamlam an kapaw ngah ih a ril.
Lamzin ih vak tualsung mi cu hriamhma a ngah ih sizung ah panpi a si.
Meithal puak awn a than ruangah Tatkone le palik sakhan ihsin meithal an kap ciamco, tiah theih a si.
Tamu khawpi luhnak ah tuni July 16, zinglam nazi 10 hrawngah SAC ralhrang le Pah Kah Pha (ပ.က.ဖ) doawknak a suak ih mipi ralkap lam Ko Aung Htay in nunnak a liam ih tualsung mi pahnih ralhrang in an kap that, tiah theih a si.
Tamu mipi ralkap pawl hmunram thianfainak an tuah laiah khawpi luhnak datsi zuarnak kiangah zan ihsin rak bawhtu SAC ralhrang 200 rual cun an rak kap ih nazi 2 sung lai kahawknak a suak.
Cuti an kahawk rero laiah thil phur motor rak mawngtu driver le mi 1 cu motor ihsin SAC ralhrang in an dirthla ih an kap that. An ruak cu meisa in an urkang nan, mipi ralkap lam in an mit man.
Hi doawknak ah Tamu PDF Battalion (4) ih bomnak in Ko Aung Htay ih ruak an lasuak thei, tiah theih a si.
Leave a Reply