Ukraine nunau pawl cu Russia ih an siimnak rak dotu an ralkap pawl bomnak hrangah Fundraising danglam zet an tuah.
Lawngfangkheh rori in an zukaw ih an thlazuk cu an zuar hai. An lawngfangkheh zuk an zuar ih an ngahmi hi Pound 500000 lenglo an ngah zo ih an ngahmi sumpai cu ralkap pawl bomnak ah an hmang, tiah Unilad thuthang cun a tarlang.
Anastasiya Kuchmenko timi cu ‘TerOnlyFans’ timi project pakhat a tuah ih an ram ralkap pawl bom thei dan a pol. Cutin Ukraine fala pawl a sawmkhawm ih lawngfangkheh in an zukaw hai.
An zuk (photo) cu an zuar ciamco ih an zumnak hnakin an hlawhtling zet, tiah Unilad thuthang in a ngan.
Kum 23 mi Nastsassia Nasko timi cun lawngfangkheh ih a zukmi a Instagram ah a post ih minute 5 tluk a rei ah cakuat 10 a dong man, tiah amah in a rel.
Anih cun a rualnu Ansatasiya Kuchmenko ih sawmnak vekin TerOnlyFans-Ter timi an din ih an ram humhimnak hrangah an cangvaih thu a rel.
Social media ah kum tling zo pawl lawngih zoh theihmi OnlyFans timi zuknung borhbah suah theunak thawn an hmin a bangaw ruangah soiseltu khal an um.
Asinan TerOnlyFans le OnlyFans hin pehtlaihawknak zianghman an neih lo thu an simfiang.
“Kannih hi hlawhhlang kan si lo. Kan ram buainak ruangah kan ralkap pawl bom duhnak pakhat lawngih thiltuah kan si,” tiah Nasko cun a simfiang.
Hi cangvaihnak hi 2022 February 24 ah Putin ih Russia ralkap pawl cun Ukraine ram an siim hnu lawngih ummi a si.
Leave a Reply