Kum 21 mi ‘Lesly Lisbeth Ramirez’ timi nu cun ekinn sungah a naupaimi a siatter tuangah thuthennak zung cun kum 50 thawngtla dingin daantatnak an nei.
Thuthennak zung ih daantat dan cu a lawmmam tuk tiin Human Rights lam cu an lungawi loih lamzawhnak tiang an neih phah.
El Salvador tam ih nunau pakhat Lesly Lisbeth Ramirez cun 2020, June 17 ahkhan ekinn ah a pum sungih naute a paimi cu a tlakter.
Lesly Lisbeth Ramirez hin ekinn kua sungah naute (nunau) a hrinsuah hnu lawngah nau a siat ti a theihawk fang thu a rel.
Asinan an ram daan in nauthlak an sian lo ruangah tuvekin thuthennak zung cun daan khoh zet hmangih an hremnak a si.
Lesly Lisbeth Ramirez cu nau a siat pekte ah sizung ah fehpi a si ih sizung ih tuamhlawm rero a si lai, ni 10 rei ah thuthennak zung ah kawh a tong cih.
Lesly Lisbeth Ramirez cun, ‘ka pum sung naute ka sunral ih ka thinhar zet laiah thuthennak zung ah in ko. Tawkfang in thubuai in orhter cih,’ tiah a rel.
Cuti thuthennak zung ih an kawh cu a thi put a reh hrih lo ruangah a feh duh lo. Curuangah thuawih lo tiin thubuai an orhternak khal a si, tiah a sim.
El Salvodor ram president ih sihni zung ih thusuak ahcun kum 21 Lesly Lisbeth Ramirez hin amai thisen thawn a paimi a naute ih nunnak a laksak ruangah kum 50 thawngtla dingin daantat a si, tiah an ngan.
Hi daantatnak hi 1998 ih an ramsung nauthlak khamnak daan an tuah hnuah luarkai zetih an hman a vei khatnak a si, tiah Human Rights pawlkom lam cun an sim.
Asinan thuthennak zung lam cun nauhak thluakbekte hi a siat menmen si loin a hngawng ah nam ih dawhnak hriamhma 6 a um ruangah lainawngnak (laithat) a tling, tiah an sim.
Human Rights pawlkom cun Lesly Lisbeth Ramirez parih daantatnak hi thuthentu lam in mipa le nunau parah thleidannak nasa zet a neih ruangah a si ih a dikdawh lo, tiah an do ve.
Leave a Reply