Chin ramkulh Matupi khawpi ah Matupi peng Education Officer U တင်လွေး cu CDF-Matupi in an that ih himi thu ah CDF-Matupi cu khawruahnak tlaksamnak an nei, tiah an mawhthluk thu International CDF Dai Supporting Committee le North America Dai Community cun October 30 ah thu an suah.
CDF-Matupi ih Dalan thianfaitu pawlkom hin tlawng bawi U တင်လွေး an thahnak san bik mipi theih ah langtlang zetin thusuahnak an neih lo lawng si loin theihpitu (tetti) fumfe nei loin U တင်လွေး cu CDM a tuah lo ruang menah Dalan tiin puh a si ih cumi menah an that, tiah an mawhthluk.
Cu hleiah CDF-Matupi Dalan thianfai pawlkom hin mipi ralkap pawl ih thlun dingmi Code of Conduct vekin an mi huatmi cu ko tahratin nunsimnak an tuah thei cingin tlawng bawi U တင်လွေး cu cuvek thusuhnak khal nei loin a nufa pawl mithmuh rori an an thah rtuangah NUG Education Ministry zung in February 4 ih thu a suahmi No.1/2022 Article (4) nak an kalh a si, tiah an thusuah ah an tarlang.
Curuangah CDF-Matupi ih dalan thianfaitu pawl cu khawruahnak tlaksam ruangah aatthlakza thil an tuah a si, tiin International CDF Dai Supporting Committee le North America Dai Community cun lungrual in October 30 ah thu an suahnak a si.
Matupi peng Education Officer U တင်လွေး Non-CDM cu October 16 ah Matupi ih a inn ah CDF-Matupi in an thianfai.
CDF-Matupi lamcun U တင်လွေး hi SAC ralhrang fimzirnak hlawhtling dingin bawmtu pakhat a si hleiah CDMers pawl an hmin cazin la in a phunphun in a hringhro ih an hmin cazin cu SAC ralhrang hnenah a thehlut.
Cu lawng hman si loin CDM tlawng saya thenkhat ih thla hlawh suahsak in ralhrang pinsin zo Captain Win Naing thawn sumpai an suahsak, tiah an sim.
CDF-Matupi cun U တင်လွေး cu ca in ttum thum, kaa in vei ziangmawzat ralrinnak an pek khalah a thlun duh lo lawng si loin CDF-Matupi riangri a rak kamkhat linglet, tiah an sim fawn.
CDF-Matupi ih thusuah No.2/22 le casuah No. 4/22 vekin mipi phatsantu le SAC ralhrang din hngehnak tthuam a si tiin an thianfai thu CDF-Matupi cun October 17 ah thu an suahmi a si.
Leave a Reply