Yangon, Hlaing peng, Thukha cawlhhmun kiangih duhphorhnak neitu mino pawl cu July 7, simlam nazi 3:30 hrawngah SAC ralhrang in private motor in an pah ih an thekdarh.
Duhphorhtu mino pahtu hi YGN7J/5050 motor a si ih motor dunglam ihsin meithal puak awn khal a suak cih.
Motor ih an pahmi minote hi a rualpi pawl lamzin laifang ih an feh ding remti loin amah in lamzin lai a cuh hrim, tiah theih a si.
Duhphorhnak nei ih lamzin an feh laiah motor cun an dunglam ihsin a run pah ih lamzin laifang zawhtu mino cu a tlu tupti thei.
An pahmi hi a ke ah hriamhma na zet ngah cingin a tho tualto ih kaih ngah phangah a tlansuak thei, tiah a rualpi pawl in an sim.
“A mitthlam ah inn ih a nu le pa a hmu ih cuzawng le vei le khatah a tho. Atu ahcun a tlansuak thei. Asinan a hriamhma lawngte a na zet,” tiah an sim.
Duhphorhnak tuahtu pawl tibuai dingin SAC ralhrang cu private motor 1 in an ra ih meithal vei hnih an hmet puak fawn.
Cumi hnuah motor 4 a ra thleng cih ih a kiangih icar Service Center ah lut in CCTV pawl cekfelnak an nei rero, tiah Hlaing Info cun a sim.
Nikum December khalah Yangon, Kyeemyindaing peng, Pan Pin Gyi lamzin ah daiziartei’ duhphorhnak neitu mipi pawl SAC ralhrang in motor in a pah ih mino tam zet hriamhma ngah in an kai.
2022, May thla khalah Yangon ih duhphorhnak tuahtu mino thenkhat motor in an pah ih mi 5 an kai thotho.
Leave a Reply