Duhdawtaw zet PDF nupa, cangsualnak in nun an liam

Khin Oo peng PDF sakhan pakhat ah PDF nupa duhdawtaw zet Ko Min Aung Naing le မသွဲ့နန္ဒာအောင် cu zian an dennak hmunah cangsual in an thi.

Annih nupa hi February 20 ih cangsual an si ih mine puak ruangih meisa kangnak hriamhma tuar loin Ko Min Aung Naing cu February 23 ah a thi. A nupi မသွဲ့နန္ဒာအောင် khal February 24 ah a thi ve, tiah an sim.

Hitei’ nupa thu thawn pehparaw in Khin Oo khawmi pakhat in hitin a rel.

“An cangsual thu kan theih tikah kan thin a nuam lo. An cangsual dan hi a roh tuk. An taksa a kang ttawt zet ih a pasal Ko Min Aung Naing a thih hmanah a nupi မသွဲ့နန္ဒာအောင် hin a thei lo.

Suahpi unau vek rori ih ei tlang, in tlang le nung tlang hrangah celhawk a tha lo, kan tuar tuk,” tiah a sim.

Ko Min Aung Naing hi Khin Oo peng Daanthiam pawlkom ah Chairman a tuan vekin NLD party rinsan zetmi a si. မသွဲ့နန္ဒာအောင် khal Khin Oo peng, NLD party ihsin Pyithu Hluttaw palai Dr. Win Aung ih fanu nautabik a si ih Mandalay phunsang tlawng ah LLB in tlawng a theh ve.

Annih hi an ngaizawnawk vanglai 2021 ah SAC ralhrang in rampi thuneihnak an la ih cutin Khin Oo peng duhphorhnak ah an pahnih in a tlo-rawtu bikbik an si.

Khatlam khatlam nu le pa lungkimnak in neiaw dingin an zuam ih an kutsih ding ni pawl an relfel hlante ah hramlak ah tlan a tul ih mopuai hlunghlai zet khal an tuah man lo.

Magway University of Technology ih tlawngta hlun Ko Chit Win Mg cun, “Kan dungte ah kan rualpi Ko Min Aung Naing mine tuahnak ah cangsual in a nupi thawn nun an liam. Kan riah a se ngaingai,” tiah a ui zet thu a ngan.

မသွဲ့နန္ဒာအောင် tei sung hi an malmak zet ih a pa NLD Pyithu Hluttaw palai Dr. Win Aung cu hramlakah a relh nan, a nupi le fate thenkhat SAC ralhrang in an kaihsak, tiah theih a si.