Myanmar rampi thuron Daw Aung San Suu Kyi cu SAC ralhrang in an kaih sungah a upa U Aung San Oo in a pai’ ro innpi lonsak dingin a timtuah rero, tiah theih a si.
Yangon University Avenue lamzin Plot No. (54) ih Daw Aung San Suu Kyi ih luahmi a pa Aung San ih innpi cu a upa Aung San Oo in longsal dingin thuthennak sang bikah a thlensal (appeal) ih Pyitaungsuh thuthennak (Supreme Court of the Union) cun June 27 ah thubuai an tharthawhsal ding.
Hi innpi hi Daw Aung San Suu Kyi in a pai’ ro a comi si in caan reipi a luahmi inn a si.
2001 ihsin U Aung San Oo cun a pai’ innpi cu co ve duh in buainak a thlen ih zuar tahratin a man kauseu co a beisei. Asinan thuthennak zung lam cun 2016 ah Daw Aung San Suu Kyi nehnak an rak coter thung.
Yangon nitlaknak pengthen thuthennak zung cun a tanglam bangin lairelnak an neihsak.
Innhmun eka 2 ih kau, Daw Khin Kyi hmin langnak Plot No. (54) ih inn dot hnih le hmunram hrekkhat cu Daw Aung San Suu Kyi ih co dingah le inn dot khat umnak hmunram hrekkhat cu U Aung San Oo ih co dingin an thensak.
Asinan, hi thusuak hi U Aung San Oo a lungkim thei riai lo. A pai’ ro inn le hmun pawl zuar thluh viar in a man kauseu co ta rori a beisei.
Cutin thuthennak zung tintian ah a feh. Asinan khuitawk thuthennak zung khalin an rak relfelsak duh lo/thei lo.
Tu-ahcun a suahpi a farnu Daw Aung San Suu Kyi cu SAC ralhrang in an kharhkhum laitak a si ih cumi cu caan remcang ah la in a pai’ ro innpi le a hmuan pawl lonsak dingin U Aung San Oo cun thazang thar a lasal.
U Aung San Oo hi General Aung San le Daw Khin Kyi ih fa upabik a si ih tu-ah kum 79 a hmang rero.
Leave a Reply