Thilmak: Daw Aung San Suu Kyi Yangon a inn ah an kuat tlung

Nay Pyi Taw thawnginn ih khummi Daw Aung San Suu Kyi cu rinlopi’n Yangon ih a inn ah July 6 ah a tlung, tiah NLD mi le sa pawl hnen ihsin theih a si.

Myanmar rampi thuron Daw Aung San Suu Kyi cu SAC ralhrang in Nay Pyi Taw thawnginn ah a hranten an retmi a si ih tuvekin Yangon a inn ah an kuatsal timi cu zohman in a sullam an theifiang thei lo.

SAC ralhrang lam khalin himi thu thawn pehparaw in thusuah zianghman an nei hrih lo.

July 19 khi a vei 75 nk Myanmar Martyr Day a si ih General Aung San fanu a si vekin himi ni hmanter an duh teh a si pei maw? Martyr Day ah Martyrdom ah feh in zuunngai par teh a siah pei maw, ti cu a tikcu lawngah theih a si ding.

July 4 ahkhan Daw Aung San Suu Kyi ih a umpimi minung 8 le a ui fim cu Nay Pyi Taw ihsin Yangon ah kuat a si zo.

Nay Pyi Taw thawnginn ihsin a umnak kel ah ret dingin ASEAN palai in June 27 ah SAC ralhrang hnenah ca a kuat ih cuvekin ramdangdang khalin dilngennak an nei ve.

Himi ruangah SAC ralhrang hin hmaifai a duh ruangah Daw Aung San Suu Kyi hi Nay Pyi Taw thawnginn ihsin Yangon a inn ah a kuat tlungsal a si thei, tiah an sim. (DVB).