Naypyidaw thawnginn ih khummi Myanmar rampi thukungron Daw Aung San Suu Kyi cu duh vekin vehvai a theih nawn lo ih zarh khatah vei khat lawng veh a theih ding, tiin Naypyidaw thawnginn thawn naihniamaw zet mi pakhatin October 26 ah RFA hnenah a sim.
A hlanah cun nitin deuhthaw in-ei pek a theih nan, atu ahcun Insein bomb a puah hnu tikcu bikhiahsak in vehvai a theih ding, tiah thawnginn kiangkapih um mi pakhat in a rel.
Insein thawnginn ih thawngtla pawl vehvaihnak zung khan cu October 19 zinglamah bomb puah a si ih mi 8 an thih hleiah mi 18 hriamhma an tuar. Cumi hnu cun thawngtla vehvai le thilri pek an khap, tiah sihni pakhatin a rel.
Atu ahhin Daw Aung San Suu Kyi hin nawhthuh thubuai 5 hmasuan ding a nei lai ih zarh khatah vei hnih thuthennak zung ah a feh.
Hi thubuai ah Daw Aung San Suu Kyi, President U Win Myint le Dr. Win Myat Aye tei’ pathum parah Helicopter leinak, sannak le a pehparmi thubuai tiin an fehpimi a si.
Daw Aung San Suu Kyi hin thubuai 19 a orh ih cumi sung ihsin thubuai 14 hrangah kum 26 thawngtla dingin daan an tat zo.
Leave a Reply