2023, January 18, simlam nazi 3 ah Falam khawpi sung ih CNA ralkap in palik pawl an ra kahmi thu thawn pehparaw in a ramneitu CNO/CNDF cun a tanglam bangtukin thu an suah.
1. Hi kahawknak hi CNO/CNDF thawn pehparawknak a um lo, tiah kan tarlang.
2. A ramneitu hriamhrei kai pawlkom hnenah simtheihnak nei loin ralkah hi CJCD ih neihmi daan buar a si. Cuvekin Falam peng sung CNO/CNDF ih siannak lole thuruah reltlangnak um riai loin an ra kah ruangah kan mawhthluk a si. Lehhnuah tuvekin a cangvaitu cu thungrulh an si ding.
3. Kahawknak thawn a pehparaw lomi hriamtuar nauhak telin, mawhnak nei lo an kaihmi pawl kan lo tuarpi ih SAC ralhrang dinpitu pawl kan lo mawhsiat a si. Kaihmi pawl a zamrang thei bikih suah zalen dingah le suah zalen an si lo asile CNO/CNDF in a hamkha thei bikin lehrulnak kan nei ding a si,” tiah an tarlang.
Himi thu thawn pehparaw in CJDC khalin ralkah thu ah khat le khat theihterawknak le upatawknak neih a tul, tiah CJDC ih sungtuan 1nk Salai Pauluh in a sim.
“CJDC sungtel sungah raldo khawm ding asile cangvaihnak ding hmunram neitu hotu pawl thawn thurelkhawmnak neih ta ding a si, tiah a um. Komkhawmaw ih cangvaih ding tivekin. Mani Falam thilthlengmi thawn pehparaw in khatlam khatlam tongaw ih theihterawknak neih a tul, tiah ka hmu.
Cu hleiah CJDC sungtel pakhat le pakhat lakah tihzah upat thiamawknak a tul tuk rori,” tiah The Mindat Post ih thu an suhnak ah Salai Pauluh cun a sim.
Cuvekin Falam khawpi sung kahawknak thu thawn pehparaw in CNO/CNDF ih thusuahmi hi CJDC ih daan le dun vekin a si, tiah CJDC ih sungtuan 1nk Salai Pauluh cun a sim hrih.
Leave a Reply