Chinnu ralhrang in an that, thla 6 hnuah a thih thu a innsang in an thei fang

Chin ramkulh, Matupi khawpi ih bukhuar SAC ralhrang ဗျူဟာကုန်း ihsin ralhrang 2 cu meithal 3 thawn 2022, April 21 ah CDF-Matupi hnenah an tlanlut.

Ralhrang 2, CDF-Matupi hnenih an tlanluh ruangah Matupi khawsung nunau 6 telin mi 7 an kai ih ဗျူဟာကုန်း ah an hruai so. Annih hin ralhrang 2 tlansuak dingin an bawm, tiah an puh ih ralhrang hremhmun ah an dekcok.

Cuti an soisatmi lakah Matupi khawpi ih khawsa, Vankai khawsuak, kum 30 hrawngih upa nunau Ma Dizin (မဒီဇင်) khal a tel.

မဒီဇင် hi ralhrang in an kaih hnu thla ruk tiangah a innsang thawn tonawk an siang lo ih khuitawkah a um ti khal a innsang in an thei lo.

Curuangah a innsang pawl in kan dungte ah thuneitu pawl an suhhlam tikah မဒီဇင် cu 2022, June thla laiah ralhrang ih an hremnak ruangah a thih thu an rak sim.

မဒီဇင် thih thu thawn pehparaw in Matupi thuthennak zung cun ‘thihnak ca’ kan dung zarh ah an tlangthan, tiah theih a si.

မဒီဇင် thawn an kaihtlangmi nunau pakhat khal tuni tiang a innsang lam in an pehtlaih thei hrih lo, tiah theih a si vivo.

Matupi khawpi ralhrang hremhmun ahhin မဒီဇင် le ဖနိုင်သား khawmi mipa pakhat an hremthat, tiah theih a si.