China, Russia le India in SAC ralhrang dunglam ihsin an dinpi

China, Russia le India hin Myanmar SAC ralhrang uknak hnget dingah a dung ihsin an dinpi, tiah ASEAN Parliamentarians for Human Rights (APHR) in tuni an thusuah ah an tarlang.

SAC ralhrang in Myanmar rampi thuneihnak a lak ihsin tuni tiang, China, Russia le India in anmai’ ram hlawknak ding ruat in SAC ralhrang an dinpinak a luarkai sinsin, tiah APHR cun a sim hrih.

Ramlian 3 ih dinpinak ruangah SAC ralhrang cu puarthau zetin milai covo a buar ih mangmittokza in suahsualnak phunkim a tuah ngam, tiah an sim fawn.

Khatlamah China, Russia le India in SAC ralhrang a dinpi vekin Democracy duhsaktu nitlaknak ram pawl hin Myanmar parah thungaithlak in an bawm taktak lo, tiah APHR cun a sim hrih.

SAC ralhrang cu zohman hnimhnaitu um lo, pakvai zet ih hremnak a phunphun pe dingah Myanmar mipi aiawhtu NUG thawn tonawknak nei dingin leitlun ram pawl APHR cun forhfialnak a nei.