Lai meithal rori in a hmaisabik SAC ralhrang dotu Chin ralkap le ralhrang tuni tiang an doawknak a dai thei hrih lo.
RFA in a ngankhum dan vek asile October thla sungah Chin ramkulh tualsungmi 8 an thi ih 12 hriamhma an pu.
Himi lakah a tam swn cu mine kammi palpuak le pukpi, meithal ih kah ngah ruangah an si.
October 11, zan nazi 9:30 ah Teddim peng ah ralhrang ih pukpi kahnak ruangah nupinu Nu Vung in nun a liam. Nu Vung hin a fate pahnih le a pasal a fehsan.
October 19 ah Hakha peng, Buanlung khua ah ralthuam tum a puak ih tualleng tlawng kai James Siang Za Uk le Henry Bawi Za Lian in nun an liam ih Nancy timi nunau nauhak in hriamhma a ngah.
October 14 khalah Kalay-Teddim lamzin Hriangzing khaw kiangah SAC ralhrang tomi motor mine puah a si ih ralhrang hnenih to, Hriangzing khawmi 10 hnakih tam hriamhma an ngah.
CHRO hnatuan Salai Za Uk Ling cun, “SAC ralhrang hin mawhnak nei lo, tualsungmi pawl hmuitin in a kap theu hi ramdang pawl in hmualna zetin an kham a tul,” tiah a sim.
ICA ih ngankhum vek asile 2021 February 1 ihsin 2022 October 31 tiang, Chin ramkulh sungah SAC ralhrang ih kahnak ruangah tualsungmi 347 in nun an liam zo.
Chinmi 46200 in mai inn le lo suahsan in an tlan, tiah UNOCHA in October 31 ah thu an suah.
Leave a Reply