Sagaing ramthen, Kalayyo le Chin ramkulh, Falam khawpi fehnak lamzin ih khualtlawng motor pawl sumkhon theunak Taingen ih ralhrang Duty-nak sakhan cu CDM-Siyin in October 23 zing ah an kah thu theih a si.
Zinglam nazi 8 hrawngah naihniam zetin mine kam in an puah ih ralhrang 3 an thi, tiah CDM-Siyin cun October 24 ah thu an than.
Cumi hnuah ralhrang dang an ra bet ih minute 10 hrawng khatlam khatlam kahawknak a suah hnuah CDM-Siyin ralkap pawl cu hmun him lamah an kir thei, tiah an sim.
“Hi Ralhrang duty-nak sakhan hin khualtlawng motor pawl sumpai hramhram in an khong. Motor 1 ah ting khat an phut. Tui’ zing ih motor mawngtu pakhat cu ‘Hei…ding hnik tiin sumpai an khon laiah CDM-Siyin in pi 10 hrawng hlatnak ihsin mine kan puah,” tiah CDM-Siyin sungtel mi pakhat in a sim.
Cumi hnuah anmah bawm dingin ralhrang 60 lenglo cu motor 3 in October 24, zingthlapit nazi 4:48 ah CDM-Siyin in minute 8 hrawng an kham ih an rak kap.
Curuangah ralhrang 30 ttha lawng Taingen sakhan ah an thleng thei, tiah an thusuah ahcun an tarlang.
Leave a Reply