CDM tlawng saya/ma pawl cu an hna kel tuansal duh an um asile June 7 tiang ni netabik khiah in kirsal dingah SAC ralhrang cun sawmnak a neihmi cu saya/ma 2960 in pehtlaihnak an nei zo, tiah theih a si.
Mai hna kel tuansal duhtu tlawng saya/ma an tam vivo ruangah SAC ralhrang cun a ni khiahmi a thawnsal ih June 14 tiang caan a dirhsal thu SAC ralhrang cun June 7 ah thu an suahsal.
Tlawng saya/ma CDM ihsin mai hna kel zomsak duhtu pawl cu pehtlaih duhnak lungthin an nei ko nan, pehtlaihawknak lamzin harsat ruangah a tikcu kelin theihternak an neih thei lo ruangah June 14 tiang tikcu an dirh saunak a si, tiah SAC ralhrang cun an thusuah ah an telh.
Tuvekin tlawng saya/ma pawl mai’ hna kel pehzom dingih sawmnak ca SAC ralhrang in a suah ruangah CDM lut saya/ma tampi cu a cokbuai zet ih kirsal duh khal an tam zet. Khatlamah SAC ralhrang uknak a cem lai hlanlo CDM tuah duhtu saya/ma khal tor le seng an um lai, tiah theih a si.
Ayeyarwaddy ramthen sungih hramthok tlawng ihsin CDM luttu saya pakhat cun, “Ziangtlukin an ri khiahmi thawnsal rero khal hai sehla ka kirsal cuang lo ding. Thenkhat cu CDM tuah nawn loin an kirsal ko. Hi khal anmah le pumpak duhhrilnak a si ko,” tiah a sim.
2022-2023 fimzir kum ah Myanmar rampum huapin tlawngta mipim million 5 lenglo in tlawng hmin an ap, tiah SAC ralhrang cun thu an than.
Leave a Reply