CDM palik cu a nupi damlo veh dingin inn ah a tlung duak ih ralhrang in an rak kaih

CDM palik Sergeant pakhat cu a nupi a damlo ruangah veh dingin a tlung duak ih kaih a tong.

Mandalay ramthen, Shwebo peng ih CDM tuahtu palik sergeant pakhat cu inn ah a tlun duak laiah an kai, tiah theih a si.

CDM tuah ih hmun himnak ih um palik sergeant Thein Tan cu a nupi a dam lo ruangah vehvai dingin a umnak hmun ihsin inn ah a tlung.

An khua hi Shwebo peng, Kaw khua a si ih June 3 ahkhan nupi dam lo ruangah a thupten inn ah a tlung.

SAC ralhrang lamtang security pawl in an theih ruangah a inn an va kulh ih an kai, tiah khuami pawl in an sim.

Palik sergeant Thein Tan hi Shwebo palik sakhan ihsin CDM a tuah ih innsang tan in hmun himnak ah va relhtu a si.