Cancer tuamhlawm dan thar an hmusuak, an tuamhlawmmi mina 12 an zaten an dam

The New York Times thuthang ih a tarlangnak ah tawkua (tol) cancer tuartu mi 12 cu sivai bangaw pe in tuamhlawm sinnak an neih tikah an zaten an dam theh, tiah a ngan.

Memorial Sloan Kettering Cancer Center ih sibawi Luis A. Diaz Jr. cun sivai company GlaxoSmithKline ih tuahmi sivai thawn cancar nat neitu pawl an tuamhlawm ih an dam thu hitin a rel.

“Hihi cancer thuanthu ah a hmaisabik tiah ka ruat” tiah a sim.

California ramkulh, San Francisco phunsang tlawng ih rilpi cancer tuartu mi pakhat khal a dam, tiah theih a si.

Cancer nat neitu pawl cu a hlanih tuamhlawm dan vekih Chemotherapy, Radiation Therapy le surgery tuah tikah cancer hmasi a reh thei lo. Asinan tui’ tuamhlawm dan thar an hmuhsuahmi ahcun cuvek a si nawn lo.

“Ka lungawi tuk lamah ka mitthli a luang thei,” tiah Memorial Sloan Kettering Cancer Center ih sibawi Andrea Cercek cun zarhpini ih American Society of Clinical Oncology tonkhawmnak ah a rel.

Sibawi Venook cun mangbangza zet thil pakhat ummi cu mina pawl hi an dam hnu khalah an natnak in lehhnupi tiang hngor a nei theu, cumi khal a um nawn lo ding, tiah a sim ve.

Sivai hi thla ruk danah zarh thum sung pek an si ih US Dollar 11000 hrawng an cem ding. Sivai cun Cancer cell pawl a humhim lo ding ih dokhamnak amahte a tuahsuak sawn ding.

Sivai hi a pin deuh ruangah damlo 5 ah 1 lawngin sivai ruangih harsatnak an tong men thei nan, olsamten an dam thei thotho ding. Checkpoint inhibitors hmangtu mina ih 3% lole 5% lawngin harsatnak an nei men thei, tiah an sim.

Himi hi kum 2 sung zohsinnak an neihnak ihsin an hmuhmi a si ih cancer bol pawl cu mina ih 1/3 lole a hrek tluk cu an bol tiangin a phai thluh ding ih an damsau thei ding, tiah an sim fawn.

Mina zohsinnak an neihmi ih 10% cun an cancer bol a reh rori thei. Curuangah Dr. Cercek le Dr. Diaz thawn cancer nat a lang hlan, bol a um tikah a hlankhan khalin sivai hman theih dingin kan zingzoi vivo ding, tiah a sim.

Harvard phunsang tlawng ih rilpi cancer tuamhlawmtu sibawi Kimmie Ng cun hi an hmuhsuahmi cancer tuamhlawm dan thar hi zum ban lo tluk a si, a ti ih hmailamah zuam sinsin dingin duhsaknak a hlan fawn.