Bualte khua ih mi banglo pakhat SAC ralhrang in that

Bualte khua ih mi banglo pakhat Pa Hau (Hau Cung Nung) kum – 56 cu SAC ralhrang in an that ih tui zing ah mipi ralkap CNDF pawl in a ruak an va la, tiah theih a si.

Pa Hau hi a nuseu Nu Sei thawn November 19 ni ih SAC ralhrang le CNDF mipi ralkap pawl nasa zetin Bualte kiangih an kahawk ni ihsin an hlo ih mipi ralkap CNDF pawl in SAC ralhrang in an that a si ding tiah an hawl rero hnuah Pa Hau cu tuizing ah an hmuhmi a si ih a nuseu Nu Sei cu a kedam lawng an hmu hrih tiah thuhla theitu tualsungmi pakhat cun The Rihli Voice ah a sim.

“An pahnih in mi banglo deuh an si ih khawpi pawl le CNDF in raltlan hrih dingin an sim, an dir theu ih khaw dang khalah an va ret theu nan’ ttih nakcang le tlan duh nakcang thei loin Bualte ih an inn ah an kirsal cingcing.

Pa Hau hi Lawitlang khawmi suahkeh in mi bang tuk lo le hnaset deuh a si ih Nu Sei cu pasal a neih hnuah thluak lam dik loin thinlung molhmeh a si.

Annih hi hnatuan lo ih um thiam lo an si ih Pa Hau ruak kiangah purawng pawl a darhawk celcel ruangah lo ihsin hnatuan a tlun zawngah SAC ralhrang in an rak that a si ding tiah kan zum” tiah tualsungmi pakhat cun a sim.