Leitlun zaithiam Britney Spears le a ngaizawng Sam Asghari cu June 10 ah California, The Thousand Oaks ih Britney Spears inn dung hmuan nuam zetah neihawknak hlunghlai zetin an tuah.
Hi an neihawknak ah an sungkhat pawl, thiamzung lamih hminthang Madonna, Paris Hilton le Drew Barrymore pawl sawm an si, tiah theih a si.
Britney Spears le Sam Asghari tei’ pahnih hi kum 12 in an thlauaw nan, duhdawtaw zetin kum 5 zikte an rak thluahnaawk hnuah tuvekin neihawknak sunglawi zet an tuah thei.
Hmanseh, an neihawk ni ah buainak tenau a suak. Cumi cu ziang a si ti asile Britney Spears ih pasal hlun Jason Alexander in a ra hnoksak, tiah palik pawl in an sim.
Mopuai an tuahnak hmunah cun Jason Alexander cu a ra ih security pawl in an rak kham ruangah buainak malte a suak. Cutin palik pawl in an kai.
Britney Spears le Alexander hi 2004 ah an rak neiaw ih nazi 55 sung lawng nupa nun hmangtlang in an thenawsal, tiah theih a si.
Alexander cu Britney Spears ih pasal neihnak ah a feh ve ih a feh hlanah Instagram ah Live a thlah ta hngehnge.
An neihawknak hmun a va thlen tikah hruangkulh a lan ih cutin a sungah luh a tum. Cumi cu Security pawl in an hmu ih an kaihtang.
Alexander cun Britney Spears in puai a sawm thu, a pasal hlun a sinak vekin neihawknak phiahsak a tum thu pawl a rel. A kut ah meithal khal a keng ih Britney Spears hawl in tongkam sia tla a hmang, tiah an sim.
An buainak tam zet hi social media ah thlah an duh lo ruangah an thup ih Britney Spears le Sam Asghari tei’ pahnih cu an neihawknak tlamtling zetin an fehpi thei.
Britney Spears ih sihni cun Alexaner hi a thinlung a kekkuai zet. Britney Spears in pasal a neih ruangah a thin a na a si bik. Tu ahcun palik pawl in an kol hrih, tiah a sim.
Leave a Reply