US President Joe Biden le a thainu Jill Biden cu nan nupaten cawlhahdam dingah Delaware, Rehoboth tipikap ih an bul inn ah an va tlung duak.
Cuti cawlh an hman laiah vanzam fate pakhat cu a lamzin thei loin President tei’ nupa umnak inn kiangah a va zam, tiah Ruuninn Rangpi (White House) lam cun an sim.
Curuangah president kiltu US Secret Service pawl cun President tei’ nupa cu hmun himnak le Security khoh zet hnuaiah an thiarsuak, tiah Anthony Guglielmi cun a sim.
US vanzam lam kilhimnak pawl ih ih Fighter pakhat cun zamrang zetin hi vanzam fate cu a dum cih ih bikhiahmi vanzam zamnak sung ihsin suak dingah thu a pe ih a dawisuak hnuah a nai bik Airport ah an tumter hrih.
Vanzam fate mawngtu cu tuanvoneitu pawl in thu an zoihnit rero. Anih cun vamzam zam theinak bikhiahnak hmun a si le si lo a theih lo ruangah a zam sualmi a si thu thupha a cawi. Asinan private vanzam pawlkom hnenah daan a buar ruangah a relfelawk a tul lai ding, tiah an sim.
US President tei’ nupa cu hmun him lamah an thiarsuah zo ruangah ruah ding an um nawn lo ih zianghman siatsuahawknak an nei lo, tiah an sim.
Leave a Reply