Biakinn puainak ah rawl ei an sawm ih a el hnuah a sawmtu pawl a kap that

June 16 ahkhan pacang pakhat cun rawl ei an sawmnak a el hleiah a sawmtu pawl a kap that, tiah theih a si.

Robert Smith kum 70 mi, pinsin zo, pacang cu Alabama ramkulh, Vestavia Hills khawpi ih St. Stephen’s Episcopal biakinn ah ‘potluck’ timi zanriah hilkhawmnak puaipi an tuahnak ah sawm a si ih cumi an sawmnak cu a el.

Robert Smith hi biakinn ah vei hnih khat cu a khawm ve theu, tiah an innhnen le kawhhran member pawl in an rel.

Hi ni June 16 khalah biakinn ahcun a feh ve ih biakinn leng ah lungngai zetin a to, tiah a hmutu pawl cun an rel.

Cumi cu Barth Rainey kum 84 le a nupi Linda cun an zangfak tuk ih puainak hmun ih rawl ei dingin an va sawm.

Cutikah Robert Smith cun an sawmnak a rak el. Bart Rainey ih nupi Pi Linda kum 75 mi cun Robert Smith cu puainak hmun ih rawl a ei paih lo hmanah rawl rak kaih ding tiangin a sim.

Cumi hnu reilote ah Robert Smith cu a kenmi meithal a phorh ih rawl ei lai rero pawl a va kap hai ih mi pathum an thi.

A kahmi pawl lakah amah rawl ei rak sawm rerotu Bart Rainey kum 84 le a nupi Linda kum 75 an tel, tiah biakinn dintu Dounglas Cerpenter cun a sim.

Sualnak nei lo mi 3 kaptu cu Jim Musgrave timi pa cun biakinn tohkham in a rak vuak ril ih cutin an kai ngah thei.

Palik pawl cun Jim Musgrave cu ‘paraltha’ tiah an lawm zet. Robert Smith cu an kai ih laithatnak thubuai orhter a si.