Bazaar hminthang zet MEGA Khimki a kang

December 9 zing ah Russia ram, Moscaw khawpi kiangih MEGA Khimki Center bazaar pi a kang ih a puak dumlo, tiah tualsung media pawl in video thawn an tarlang.

Meikang hi a hlio tuk ruangah hmun tam zet a kangral ih hmun dangdang a kangkai vivo, tiah an sim.

Atu tiangah Center ih hnatuan pakhat a kang that, tiah an sim. Bazaar pi kang thu thawn pehparaw in thuneitu lam cun, nawkkangtu an um, an ti vekin Russia acozah thuthang TASS cun wire shock ruangah a si, tiah a tarlang.

Russia President Putin in Ukraine meisa peknak innpi hmuahhmuah kan siatsuah thluh ding, tiah December 8 ah a rak sim.

Thlatang caan a si vekin Ukraine mipi cu meisa (electric) cat-lak in harsat zet in an khawsa ih leitlun ram tam zetin Russia an mawhthluk rero laiah tuvekin Putin hin a sim deuhdeuh.

“Innhnen ram pakhat ih electric peknak innpi pawl siatsuah dingin hmabak tampi kan nei lai. Zo si, in vuivai ngam? In vuivainak men ruangah kan hna a thak lamlam lo,” tiah Putin cun a sim.

Be the first to comment

Leave a Reply

Your email address will not be published.


*