Bangladesh ram, Chittagong Hill Tracks ih um, Bawm miphun cun a hranpaten ramkulh an neih theinak hrangah Kuki-Chin National Army tiin hriamhrei kai pawlkom an din.
Bangladesh acozah cun an ramsung ih bukhuar Arakan Army (AA) pung a sawm ih AA le Bangladesh ralkap in Kuki-Chin National Army (KNA) cu November 19 ah an do bor, tiah theih a si.
Hi doawknak ruangah Bawm mipi pawl Mizoram ah raltlan in mipum 300 lenglo an lut ih India ramri kiltu ralkap (Border Security Force (BSF) pawl in an rak kham.
Asinan, Tuichhawng Group YMA in biakinn le tlawnginn ah an umkhawmter ih in le ei an zalsak, tiah theih a si.
India ramri kiltu ralkap pawl cun Bawm miphun raltlan pawl cu an kilveng ih an ratnak lamah kuat kir an tum.
Himi thu thawn pehparaw in Mizoram Student’s Union cun thu a suah cih ih Bangladesh buainak ruangah Mizoram pan ih raltlan zaten ramri kil ralkap in an rak kham cu an mawhthluk.
Mai’ sahimnak ruat in raltlan mipi pawl cu zo vek ralthuam keng khalin rak kham lo dingah le Mizoram acozah khalin a zamrang thei bikin zohkhen dan ruahsak lohli dingin MSU cun a phut.
Mizoram Bawm Student’s Association in ca an suah ve ih, Kuki-Chin National Army le AA hi kutkaiaw lawk an si nan, atu vekin AA in phatsan tahrat in Bangladesh acozah lamah an ttansan cu poi an ti zet thu, AA ih cangvaihnak parah an thinnom lo thu, Bawm miphun pupa san ihsin leiram neihmi ah ramkulh ngah dingih an zuamnak siatsuahsak an si le miphun malte parah thahrum suah ih do an tuarnak pawl cu milai zawnruahnak an tlaksam ruangah a si,” tiah November 20 ah thu a suah.
Bangladeh ram ah ramkulh ngah thei dingin Kuki-Chin National Development Organization (KNDO) timi din a si nan, acozah in a uksak duh lo ruangah Kuki-Chin National Army din lawlaw in ramkulh ngah thei dingah hriamhrei kai ih an sualnak a si.
Leave a Reply