Bangladesh fala pakhat cu a ngaizawng tong dingah nazi pakhat sung tipi a leuh. Hi tavapi hi tisartam tam zetnak a si ih tivapi a leuh ngah hnu khalah pawpi pawl tuallennak hramlak a feh vivo bet, tiah theih a si.
Bangladesh Fala Krishna Mandal le a ngaizawng India tlangval Abhik hi Facebook ah an saraw ih an duhaw thok.
An pahnih hin neiaw dingin an relrem ko nan, Krishna Mandal kum 22 hin ramdang fehnak Passport a neih lo ruangah an neihawk tumnak an pitlin thei lo, tiah India Today cun a tarlang.
Curuangah Krishna Mandal cun ziangvek harsatnak khal pahtlang zuam in a lungduh val tong dingah daan lo vekin India luh thei dan a pol thlang.
Palik pawl ih sim dan vek asile Krishna Mandal hin mi deh thei pawpi le ramsa tihnung pawl tuallennak Sundarbans tupi a ke rori in a paltlang hmaisa. Cumi hnuah tisartam tam zet umnak Mattala tivapi nazi pakhat sung a leuh.
Krishna ih tumruhnak le a lungduh hrangih a pumpeknak cu a hlawhtling ta riai. May 28 (zarhteni) ah Calcutta ih Kalighat biakinn ah a tlangval Abhik thawn neihawknak an nei ngah.
Asinan vanduaithlak zetin duhdawtnak hrangih a zuamnak pawl cu mi in an theih tam tuk tikah palik hna ah a thleng lohli ih cutin May 30 ah daan loih ramsung ra lut tiin an kai.
Leave a Reply