Myanmar ih ra tlawng Asean Special Envoy Prak Sokhonn le tlangpar hriamhrei kai pawlkom 7 pawl cu July 1, zinglam nazi 10 ihsin 12 lan tiang Nay Pyi Taw ah tonkhawmawknak an nei, tiah theih a si.
Hi tonkhawmawknak ahcun Asean Special Envoy Prak Sokhonn cun a thuken (3) relsuahnak a nei.
A pakhatnak ah: Kahcawlhnak amah in a tuahpi ding. A pahnihnak ah: Milai zawnruahnak in bombawinak pawl a tulsammi hnen rori ah thleng dingin a zuam ding. A pathumnak ahcun: Ramthukhel (politics) relkhawmnak cangsuak thei dingin a zuam ding, ti pawl an si.
EAOs lam cun tonkhawmnak ah hi thu pawl an bur thu EAO palai vice chairperson Daw Saw Mya Yayar cun hitin a rel.
“Kannih lam khalin politics relkhawmnak cangsuak dingin kan zuam. Kan zaten teltlang theinak tonawkkhawmnak, rampi huap remdaihnak a um theinak dingah sawmnak pawl thupi ah ret in kan relkhawm.
Milai zawnruahnak in bombawiawk dan, EAO thawn tuankhawm dan, NCA hminkar thu, Federal ramdinkhawm le mahte ukawk thei dan tivek pawl kan rel,” tiah a sim.
Asean palai le tlangpar hriamhrei kai pawlkom 7 pawl tonkhawmawknak an theh hnuah The National Unity and Peace Coordination Committee Committee Chairman Lt. Gen Yar Pyae le tlangpar hriamhrei kai pawlkom 7 pawl cu an tofual bet.
Asean palai le tlangpar hriamhrei kai pawlkom 7 tonkhawmnak ahhin KNU/KNLA-PC ih Dr. Naw Ka Paw Htoo in a hoha, tiah theih a si.
Tonkhawmnak ih a teltu EAO 7 pawl hi NCA hminkartu an si ih atufang SAC ralhrang thawn tonawknak nei zotu pawl an si. RCSS, DKBA, ALP, KNLA/PC, NMSP, LDU le PNLO pawl an si.
Leave a Reply