ASEAN sungtel ram hotu pawl in Myanmar thawn pehparaw in November 10 ih thu an suahmi cu ASEAN thukham thawn a pialaw lellel, tiah SAC ralhrang in bultan zetin a el-thlak thu SAC ralhrang TV in a phuang.
ASEAN ih thuthencatmi cun, Myanmar ih thilthleng ngaingai an theih lo ruangah le ASEAN-Myanmar lungkimtlangmi (5) parah Myanmar ih zuamnak pawl ziangah an rel lo, tiah SAC ralhrang cun ASEAN hotu pawl a el.
Cun, Myanmar ramsung thu hi ramdang ihsin tawlrel ding a si lo ih Myanmar tel loin ASEAN sungtel ram 9 lawngin thuthencatnak an tuahmi khal ASEAN dinnak thukham thawn an pialaw lellel ruangah kan cohlang thei lo lawng si loin kan el-thla lawlaw a si, tiah SAC ralhrang cun a sim.
ASEAN-Myanmar lungkimtlangmi (5) khal tikcu bikhiah a si ahcun rah tha suah loin rah sia a suah sawn thei, tiah an sim hrih. ASEAN hin NUG thawn an naihniamaw hrethro a si ahcun thahrum cangvaihnak tha an pe, tinak a si ih mawhthluk an si.
Sungtel ram pakhat ih ramsung thu, ramdang in buaipi lo dingin theihternak SAC ralhrang cun a nei fawn.
Leave a Reply