An mo in hmu thei loin Kum 80 mi pitar le putar an hlon

Bago ramthen, Taungo peng ah October 29 ahkhan kum 80 mi veve pitar putar cu an innsang pawl in lamzin sirah an hlon, tiah theih a si.

October 29, simlam nazi 5 hrawngah Taungo khawpi, Shwe Linyung phungki tlawng hmaiah pitar le putar cu an tufa pawl in an hlon ti thuthang an theih ruangah tlawmngai pawlkom an va feh cih.

A hmun an va thlen tikah putar pakhat an hmu ih thuhla an suh tikah kum 80 mi putar U Yar Kyaw timi cu Taungo Myothit ih um a si ih anih hin fapa pahnih a neih thu a rel. A fapa pahnih ih nupi veve in ke thum nei bike in hitawk hmunah an ra hlon thu a sim. Tlawmngai pawlkom cun sivai an tuamhlawm hnuah ‘pipu retnak tlawng’ ah an phur.

Cuvek thotho in October 29 simlam nazi 5 khalah Taungo Nursing tlawnginn hmaiah pitar pakhat cu a fanu in a hlon. Hi pitar khal tlawmngai pawlkom in nutar/patar zohkhennak ah an kuat.

Myanmar ramsung nuntu khawsak harnak, sumluh malnak le ram buainak ruangah innsang tampi cu retheih sinsinnak a thlen. Cumi lakih a tuartu bik hi pitar/putar pawl an si.

Pitar/putar nei innsang cun nuntu khawsat harnak ruangah an zohkhen thei nawn lo, an hmu thei nawn loih hnon an tuar. Innsang ah mi hleifuan men bangin an zoh ih lamzin sirah an hlon men.

“Ziangvek dinhmun kan thlen hmanah kan nu le pa, kan pi le pu pawl hi lamzin ah hlon hramhram hlah uh. An hrangah a hamkha tuk,” tiah tlawmngai pawlkom ih hnatuantu pakhat cun a sim.