India ram, Kerala ramkulh, Palakkad peng, Ayalur khua ih nunau pakhat cu kum 18 a si laiah a hlo ih kum 11 rei hnuah an inn kiangah pasal nei in hmuh a si.
Kum 18 mi Sajitha hi 2010 laiah a hlo ih kum 11 a rei hnuah an inn ihsin metres 500 hrawng hlatnak inn pakhatah pasal a rak nei, ti an theisuak.
Himi caan laiah a pasal cu kum 24 mi Alinchuvattil Rahman a si ih annih pahnih hi 2010, February thla ahkhan a thupten an rak neiaw.
Sajitha ih nu le pa, sungkhat pawl hin an fanu hlo cu an hawl buai nasa ih an hmuh netnak bik Rahman ih inn carhlet ihsin a inn sungah a lut ih a hlo lanta, tiah lehhnupi ah an mangsuaksal.
Sajitha le Alinchuvattil Rahman tei’ nupa cu zohman ih theih lo dingin an thupaw ih kum 11 sung a thupten an neiaw.
Zan a thlen caan ah Sajitha cu room lengah a suah theinak dingah a pasal Rahman in ong fate a tuahsak. Cutin tak a kholh, rei lote lengah a va to duak theu. A caancaan ahcun an nupa in mi reh laifang ah an lengsuak theu, tiah an sim.
Annih pahnih hi sakhua biaknak bangaw lonak ruangah umtlang an si thu, mi ih an soisel ding an phan ruangah a thupteih neiaw an si, tiah an sim.
Nenmara palik sakhan bawi Depa Kumar cun, “Hi thilthlen dan hi thil dikdawh a si lo. An inn kan va zoh tikah kum rei zet thupthiar ih neihawknak a si,” tiah a sim.
Sajitha le Rahman tei’ nupa cu 2019 ahkhan hmun dangah an rak vai ih inn dang an rak sang zo.
Sajitha ih nu le pa in an fanu a hloh thu thuthang ih an suah rero hnu, an hawl hmuh thei nawn lo beidong hnuah an pahnih in rinlopi’n 2021 ah an hmu phuatphi.
Rahman ih upa Basheer cun, “Kan naupa hi thinlung kim lo bangin a cangvai a si hi. A room ah luh kan tum tikah a siang dah lo. Rawl a ei ding khalah amai room ah a la ih a ei men. Hnatuan kan fehsan caan ah an nupa hrangah thil a rak tawlrel theu a si hmang,” tiah a sim.
Tu-ahcun Sajitha hin Rahman a duhdawt ruangah tuvekin inn a suahsan ih a hnenah a um thu a rel ih thuthennak khalin neiaw dingin siannak an pe zo.
Leave a Reply