SAC ralhrang in a innsang pawl an kaih ruangah thiamaw loin puu-tat-si intu Mandalay, Patheingyi peng ih sihni nu cu tuni simlam ah a thi, tiah amah naihniamtu sungkhat hnen ihsin theih a si.
“Thuthang kan theih dan vek asile a thi timi hi nemhnget theih a si. A tapa le a naunu pahnih an kaih ruangah amai’ ruangah tiin a thiamaw lo zetih a beidong tuk,” tiah Mandalay duhphorhnak hotu pakhat cun a sim.
June 8 ahkhan Patheingyi, Oh Chaw an khua ah SAC ralhrang pawl an feh ih Sihni Ma Phyu Phyu Khaing kai ding an si nan, amah a um lo ruangah a tapa le a naunu 2 cu an vuakvelh hnuah an kai, tiah theih a si.
Ma Phyu Phyu Khaing cu sihni duhphorhnak sungtel a sinak le PDF pawl bawmtu ah puh in SAC ralhrang cun thubuai an tuah ih an hawl rero, tiah tualsungmi pawl cun an sim.
A unau an kaihsakmi pathum cu tuni tiang pehtlaih thei loin an tuah fawn.
Ma Phyu Phyu Khaing hi mizan ah puu-tat-si a in ih a kiangkap mi pawl in an tuamhlawm man ko nan, tuni ah a thi. Amah hi kum 29 mi lawng a si.
Leave a Reply