Rakhine ramkulh, Kyauktaw khawpi ih palik sakhan ih um palik pathum cu Arakan Army (AA) in an kai, tiah tualsungmi pawl in an rel.
Kyauktaw palik sakhan ih hnatuan palik officer 1, sergeant 1 le palik menmen 1 cu June 20, simlam nazi 5:30 hrawngah Kyauktaw Myothit bualrawn kiangah AA in an kai, tiah mit ih hmutu mi pakhatin a rel.
“An kai timi hi thudik a si ko. Palik pawl zu dawr ih an um laiah an kai,” tiah a hmutu cun a sim.
Palik an kaih hnuah Kyauktaw khawpi sungah meithal awn khal a thang cih, tiah khuami pakhat cun a sim. Atu ahcun SAC ralhrang pawl khawpi sungih an um hrih ruangah khawpi boruak a dai lai, tiah theih a si.
Kyauktaw khawpi ahhin June 11 khalah SAC ralhrang 2 cu AA in an kai dah zo.
Cun, June 16 ah Ponna Kyon khawpi ih ralhrang 1 le June 17 ah Mrauk-U khawpi, Tin Nyo palik sakhan ih palik 1 khal AA in an kai.
SAC ralhrang hin May le June ah AA sungtel pawl ih inn pawl zan sim hnupi ah ceknak an neih theu ruangah cumi thungrulhnak ah tiin AA hin ralhrang le palik an kaihsak ve thu ULA/AA ih thuphuangtu U Khaing Thu Kha cun June 14 ah a rak sim dah.
SAC ralhrang in AA an kaihmi pawl an thlah asile AA khalin an kaihmi pawl an thlah ve ding thu Khaing Thu Kha in a sim.
Leave a Reply