Arakan Army (AA) hnenah tlanluttu ralhrang hi a zatel an si zo, tiah AA ih thuphuangtu Khaing Thu Kha cun a sim.
Tuni June 14 ah AA thuphuangtu U Khaing Thu Kha cu online ihsin thuthang simfiangnak a nei ih cumi ah a simmi a si.
“AA hnenah ralhrang tlanluttu hi an tam zet zo, a zatel an si. Kan hnenih ra tlanluttu pawl kannih lam khalin milai zawnruahnak in a cangtheitawk in kan rak zohkhen hai,” tiah a sim.
Tuvekin AA hnenah ralhrang zatel an tlanlut zo a si ko nan, a zat cekci a rel lo ih a phuangsuak duh lo.
SAC ralhrang cu ram pumhuap in tlangpar hriamhrei kai pawlkom pawl, PDF pawl thawn nitin doawk ringring a si ruangah an thazang a derdai zet zo.
Anmah ralhrang lak khalah an thu a hmuaw thei nawn lo. Thenkhat lungfim deuh pawl cun mawhnak nei lo, mipi ih inn le lo urkangsak le mipi thah ringring ih an ning hluahhlo ve. A aa zual deuh pawl lawngin an bansan thei lo.
NUG cun tlangpar hriamhrei kai pawl hnenah tlanluttu ralhrang le palik hi thawnghra lenglo an si zo, tiah NUG ih Prime Minister U Mahn Win Khaing Than cun a sim.
Leave a Reply