A rualpi pawl sakhan suahsan dingin a fial hai ih amah in ralhrang 6 a thihcilh

Mandanlay ramthen, Singu peng le Madaya peng ih mipi ralkap (ပ.ခ.ဖ) sakhan cu June 3 sun ah SAC ralhrang in lamzin 4 in an siim.

Sakhan an thlen hlanah ralthuam tum le meithal in an kap ciamco ih mipi ralkap lam cu ralthuam le mipum thazang in an daihawk lo ruangah dungah an sip, tiah Singu tangrual pawlkom in an sim.

Hi SAC ralhrang in PDF sakhan an siim ahhin PDF ralkap pakhat Zero Two (02) timi cu hriamtuar in sakhan ah tang. Bomb pahnih a keng ih a rualpi pawl sakhan suahsan dingin a auh ciamco hai.

PDF ralkap Zero Two (02) cun a kenmi bomb hmangin SAC ralhrang pawl a rak puah ih ralhrang 6 hnakih mallo a thihcilh, tiah Singu PDF cun an sim.

PDF ralkap Zero Two (02) ih tlansuahter vekin a rualpi pawl cu hmun him lamah an tlansuak ih zohman siatsuahaw an um lo, tiah theih a si.

Cumi hnuah SAC ralhrang kirlam pawl cu PDF pawl in lamzin ah mine an rak kam ih tam zet an thi.

“Mina phur motor tu le tu an rat dan in siseh, motor parah thisen a li hnenhnen ruangah ralhrang tam zet an thi ti a fiang,” tiah Singu PDF tuanvoneitu cun a sim.

Mai’ rualpi pawl nunnak humhim dingin amai’ nunnak ui loin le ralhrang pawl thihcilh vulvo ngamtu PDF ralkap Zero Two (02) cu a sangbikmi upatnak an pek thu TBK hotu cun a sim.