A rualpi luatnak dingah a nun a liam

A rualpi pawl luatter duh ah amah in ralhrang a kap ih nun a liam.

Magway ramthen, Yaw-ram, Kyaukhtu(ကျောက်ထု) ah March 6 ah SAC ralhrang le tualsung PDF doawknak a suak ih PDF ralkap 1 cun a rualpi pawl a runsuahnak ah amai’ nun a hlan, tiah theih a si.

Kyaukhtu peng khua pakhat ah March 6 simlam nazi 3 hrawngah SAC ralhrang le PDF an kapaw ih The Youth Force (Saw & Kyaukhtu) ihsin mipi ralkap Ko Zin Phyu Lwin in nun a liam.

“Ralhrang lamin in bawh ih in kap hmaisa. Cutin khatlam khatlam minute 20 hrawng kan kapaw. Kan ralkap 1 an kap ngah ih a thi,” tiah The Youth Force ih tuanvoneitu in a sim.

Mipi ralkap Ko Zin Phyu Lwin kum 20 ih ruak cu SAC ralhrang in an urkang, tiah theih a si.

Ko Zin Phyu Lwin hi a rualpi pawl humhim in amah in ralhrang rual a kap ih ram hrangah a nun a liam, tiah upatnak sangbik The Youth Force (Saw&Kyaukhtu) in thu an suah.

The Youth Force hi NUG acozah, Defense Ministry kuttang Gangaw District No. 13 Battalion a si.