A rualpi in na ngaihzawng a lo lonsak caan ah…

Hringnun ahhin a caancaan ahcun zuknung sung lawngah hmang maw a um, ti ding khopin thilmak a thleng duh zet ṭheu.

Minung tampi cu duhdawtnak in hram kan thok ih nuam kan ti zet laiah a net kan khar dan lawngte duhum lo zet, mitthli tlaknak a si ṭheu. Cucu sungkhat, unau le rualpi ruangah kan duh zetmi fala/tlangval thawn ṭhenawk caan a thleng ṭheu a si kha!

Tuiṭum ahcun na rualpi ruangah na duh kuahkomi na koppi fala/tlangval na ṭhen thu kan relkhawm hnik pei!

Minung hi mit bangaw a rak um thei zet. Thinlung hmunkhat, duhdan bangaw le pomdan tiangin a bangaw duh zet. A hleicein rualpi lakah thinlung khat pu hi kan ngaihaw bik ṭheu.

Asile na ngaizawng fala/tlangval khi na rualpi in a lo lonsak dah maw? Cuvek thil na ton a si ahcun ziangtlukin na tuar na ding? Na ton hrih lo khal asile na tong vivo thei lai, ti thei awla a tanglam ih ruahnak lo pekmi vekin ralring cia aw.

1. Na rualpi sim ta aw: Mi pakhat thawn nan uarawk tikah a hmaisabikah na rualpi sim ta aw. Ziangahtile lehhnu buainak a thlen tikah na rualpi cun a lo theihpi ding. Cuti si loin a thupten ngaizawng na nei ih a rualnu/rualpa maw na sim lo asile amah thawn an rak kopaw riangri thei.

2. Na ngaizawng khal sim aw: Ngaizawng (kop) na neih tikah zozo thawn na rualpiaw tivek pawl sim aw. A tlunih kan rel bangin mi ṭhenkhat cu ngaizawng pahnihthum kop hmang an si ruangah nangmah lo kop tho si in, na rualpi tla a kop ceem thei thotho, ti kha hngilh hlah.

A rualpi in na ngaizawng a lo lon thotho asile:

1. Tangdor suah in a dilten dil aw: Na ngaizawng a lo lonsaktu hnenah va feh awla “nang cu kei hnakin na hmuihmel, sumpai, zirnak lamah na cungcuang deuh ih rualpi ṭha kan si vekin keimah i kian men aw. Midang na hawl hmu ol sawn ding, kei hnakin,” tiin a lemten lem awla rualpi ṭha cun a lo theithiam dingih a lo kian mai ding.

2. Zuam aw: Hi ruangah na beidong hlah. Vate zam lai zo ta bul an si lo, a sai thlatui’ ta’ an ti bangin na ngaizawng lonsak na ton tikah a lo longtu hnakih nasa in zuam aw. Na zuam lo asile na ngaizawng khal na duh taktak lo, tinak a si.

3. Netabik thucah: Na rualpi, ngaizawng lo lonsaktu cu thil umdan na sim ih ziangah a poisa lo asile rualpi sinak ihsin phiathlo aw. A parah cun thinheng hlah awla ziangahtile na duhmi a rak duh thei ve ruangah mit le thinlung bangaw rualpi ding diktak nan si, tinak a si.

Asinan, rualpi ṭha ih kaihtlak cu a si lo. ‘Good Friend’ menmen a si ih ‘Best Friend’ tiih kawh a tlak lo. Nang khal ngaizawng lonsak tiangih an um ruangah zir ding tampi na nei ve. Hmailam ah ralring thiam awla tui’ na ton vek na ton nawn lonak dingah…

Cule leitlun ah na hrang mi pakhat lawng a um lo. Midang an tam tuk lai timi thei in midang hawl men aw.

Be the first to comment

Leave a Reply

Your email address will not be published.


*