China ram, saklam-nisuahnak Shaanxi Province ih ‘Song’ timi pa cu a tlawngkaipi a rualpa ‘Zhou’ timi ih nupi neihnak hrang an retmi sumpai Yuan 25000 (US Dollar 5200) a ruk ruangah kum khat le thla kua thawngtla dingin le Yuan 3000 cawhkuanter bet ding a si.
‘Song’ hi mi hrokhrawl tak a si. A rualpa ‘Zhou’ cu nupi nei dingin mopuai an hmannak hotel ah timtuahnak an neih rero laiah Song cu tumtahnak maksak zet nei in Zhou tei’ inn ah a va feh.
Inn ahcun Zhou ih pa lawng ihkhun ah a rak um ih Song a ra luh le luh lo khal Zhou ih pa cun a rak hmu lo.
Song cu Zhou tei’ inn ah a thupten a lut ih remtung (bizu) pawhdawh sungih an retmi sumpai, a rualpa Zhou nupi neihnak hrang hmang dingih ralrinnak ah tiin an retmi China Yuan 25000 cu a ru.
Song cun a tangka rukmi sung ihsin Yuan 3700 cu a thensawng ih ihnak pindan ih hnawmbawm sungah a thup ta. A dang hmuah cu a keng.
Cumi hnuah a rualpa Zhou tei’ neihawknak hmun Hotel ah a va feh ih neihawk lompinak ah Yuan 500 a pe phot.
Cu lawng si loin Song cun Yuan 5000 a phorh ih a rualpa Zhou hnenah ‘na haidaihawk lo pangah hihi hmang aw, rualpitha kan si kha,’ tiah a cawih lai.
Mopuai an theh hnuah Song cu a sumpai rukmi pawl a cen kual ciamco ta.
Tangka hlo thu ah Song cu rinhlelh a kai ih palik pawl in an kai. Tu-ahcun kum 1 le thla 9 thawngtla dingin daantat a si hleiah Yuan 3000 cawh bet a si.
Song hi a hlan khalah thilsual tuah hmang a si ih 2018 ah thla 10 thawngtla dingin daantat dah zomi a si. Atu khalah thawnginn ah caan a hmang lala ding.
Hi thu theitu Chinese pawl cun social media ihsin Song hi an mawhthluk zet.
Leave a Reply