A pasal in uire a puh ruangah a pasal ke a vuak kiaksak, a uire taktak asile hrem a si ding

Shan ramkulh saklam, Namtau khawpi, leikhursuak laihnak hmun ah nunau pakhat in a pasal zu ri a ke a vuak kiaksak, tiah theih a si.

Thilthlen dan cu hi nunau hi cetzung ih hnatuan suakthuan mipa pakhat thawn Massege tawite an kuataw ih cumi cu a pasal in a hmuh ruangah thukam an elaw thok, tiah an innhnen pawl in an sim.

“Tlangval thawn Massage an kuatawkmi a pasal in a hmu ih thukam an elaw. A pasal cun tlangval thawn nan uire tiah a puh. Cumi hnuah thu dangdang khal an rel.

November zarh netabik a si ih himi ni ah an buai tuk lo. A thaizan ah a pasal cu zu ri in inn a tin ih ‘uire’ thu a saithawt lala. Cutikah a nupi cu a tuaraw nawn lo ih a kiangih tursing rua in a pasal ih ke a vuak kiak,” tiah an sim.

Nunaunu ih a relawk dan ahcun tlangval thawn a lengah an tongaw dah lo ih online lawngin an biakawk men thu a rel. A pasal cu a ke a kiak ih inn ah sivai tuamhlawm a si.

Pasal ke kiak ko vawtu nunau cu PSLF/TNLA in an kai ih tlangval thawn lehhnuah pehtlaihaw nawn lo dingin thukamnak an lakter hnuah an suahsal.

Cun, a pasal ih rinhmai vekin tlangval thawn an uire ngaingai asile daan vekin hrem dingah an sim, tiah theih a si.