July 4 ah Chicago khawpi ih US Independence an lom laiih meithal kahnak thleng ahkhan nauhak kum 2 mi Aiden McCarthy cu a pa Kevin McCarthy kum 37 in a nunnak thap in a hupphen ruangah a luat thei.
Asinan nauhak Aiden McCarthy cu vanduaithlak zetin nu le pa nei loin a ṭhanglian ding.
Ziangahtile hi meithal kahnak ah mi 7 an thi ih cumi lalah Aiden McCarthy ih pa Kevin McCarthy le a nu Irina an tel ve.
A hmutu pawl ih an rel dan ah Kevin McCarthy hi hriamhma tuar cingin a fapa nunnak hrang a zuam ih a taksa in a fapate Aiden McCarthy cu a hupphen, tiah an sim.
A kiangih umtu pawl cun Kevin McCarthy ih hupphenmi a fapa cu a ṭang ihsin an laksak.
Kahawknak a thlen tikah mipi pawl mah le sahimnak ah an tlan cio ih nauhak Aiden McCarthy lawngte hriamhma pu ih tlu a pa Kelvin McCarthy in a pom ruangah anmah pafa lawng langpiang in an hmu.
A hmutu pawl cun Aiden cu an zuk ciamco ih social media ah an thlah. An innhnen a simi Adrienne Rosenblatt cun Aiden ih zuk a rak hmu ih cutin a pi le pu a rak pehtlaihsak lohli.
A kiangkapih umtu pawl cun Aiden cu an ngaihsak zet ih palik sakhan ah an fehpi hnuah a pi le pu thawn an tongaw ngah.
A pi le a pu thawn an tonawk ngah hnu khalah nauhak Aiden cu, “A rei hlanah ka nu le pa in in ra ko ding si lo maw,” tiah a nu le pa a hlam lai, tiah an sim.
Atu ahcun Aiden McCarthy cu nu le pa nei lo, Hngakṭah ah a cang. A pi le pu ih zohkhennak hnuaiah a nun a sersuak thlang ding.
Aiden ih nuseu ih fa, a cousin Irina Colon cun Aiden McCarthy hrangah GoFundMe a ong ih July 6 tiangah US Dollar 2 million a lut zo.
Leave a Reply