Le Kaing palik sakhan PDF pawl in an siim ih a nunglai ih an kaihmi palik pakhat cu a tlansuak. Cuti a tlansuahnak lamah PDF pawl ih kammi bomb a pal puak ih a thi, tiah theih a si.
Pauk peng, Le Kaing palik sakhan an siim tumah PDF pawl cun palik pakhat a nunglai in an kai. Hi palik cu a tlansuak thei ih asinan a tlannak lamah bomb kammi a pal ngah ih a thi thotho, tiah Young Revolution Front YRF Bo Na Pauk cun June 8 ah a sim.
Hi palik sakhan siimnak ahhin dothlengnak hriamhrei kai pawlkom 9 tangrual a si ih palik 3 an thi. Palik 1 a nunglai in an kai. An kaihmi palik pa cu PDF sakhan ah an ret laiah a tlansuak ih bomb kammi a pal puak ngah ih a thi, tiah theih a si.
“Mani Le Kaing palik sakhan kan siim tumah palik 3 an thi. Pakhat hi a nunglai in kan kai. Kan kaihmi cu kan sakhan ah thusuhnak kan neih rero laiah a tlan. A tlansuahnak lamah bomb kan kammi a pal puak ih a thi. Cuticun palik 4 thi tlukah an cang,” tiah Bo Na Pauk cun a sim.
Palik sakhan siim tumah hin palik tam zet hriamhma an ngah ih sizung ah um, ke tan tul tiang an si. Sakhan hmu lawngte a luat, tiah a sim hrih.
Palik sakhan an siim hnuah sakhan cu an urkangsak. Hi tumah hin tangrual pawlkom lam ihsin mi 2 in nunnak an liam ih 3 in hriamhma an pu ve.
Leave a Reply