A nui’ ro zemmi lungkim loin a fapa in a nu a that ih a taksa ṭhen 15 ah a can som

Malaysia ram, Perak ramkulh ah ro zemawk thu ah lungawi loin a fapa cun a nu a that.

A nui’ taksa cu nam in hmun ṭhen 15 ah a sat som ih an inn dung tidai luannak lihong ah a hlon.

June 4 sim lamah Parit Buntar khawpi kiangih innhmun pakhat ih sawng khatnak ihsin a suakmi thil rimsia cu innhnen pawl in an theih ruangah palik hnenah an report.

Palik pawl cun lihong luannak (sewage) an zoh tikah milai taksa ṭhen tampi an hmu.

Kum 68 mi nupinu cu a fapa kum 48 in a that ti an thei ih palik pawl cun an kai cih. A fapa hi an kaih laiah thinlung lam buainak a nei, tiah palik bawi Wahid cun a sim.

Thil rimsia an theih ruangah innhnen pawl in an report ih palik an va thlen tikah inn sungah thingbel ih khuhmi lihong ah nunau taksa ṭhen tam zet an hmu.

A thitu nupinu hi hmun dangih um a fanu in May 28 lai ihsin a hlan rero zomi a si ih a pehtlaih thei dah lo ruangah palik hnenah tla a rak sim zo hngehnge.

A fanute in a rel dan ah thah a si hlan ni khat duh ah a nu cu phone in a ko. Asinan a upa in phone a kai ih a nu cu lengah a lensuah thu in a sim.

Cumi hnuah a biak thei nawn lo ruangah palik hnenah a sim ih palik pawl in vei khat an inn an va zoh dah.

Lehhnu ahcun innhnen pawl ih thil rimsia theih ruangah mai’ nu thattu misual a fapa cu kaih a si.